ಬೈಕ್ ಮಾರಿದರೂ ಜವಾಬ್ದಾರಿ ನಿಮ್ಮದೇ! ಹೈಕೋರ್ಟ್ ಸ್ಪಷ್ಟನೆ

ತಂತ್ರಜ್ಞಾನ 3 weeks ago ಬೆಂಗಳೂರು ನಗರ

ಬೆಂಗಳೂರು: ವಾಹನವನ್ನು ಮಾರಾಟ ಮಾಡಿದ ಬಳಿಕವೂ ನೋಂದಣಿ ಪ್ರಮಾಣಪತ್ರ (RC)ದಲ್ಲಿ ಮಾಲೀಕರ ಹೆಸರು ಅಧಿಕೃತವಾಗಿ ಬದಲಾಗುವವರೆಗೂ ಆ ವಾಹನದ ಸಂಪೂರ್ಣ ಜವಾಬ್ದಾರಿ ಮೂಲ ಮಾಲೀಕರ ಮೇಲೇ ಇರುತ್ತದೆ ಎಂದು ಕರ್ನಾಟಕ ಉಚ್ಚ ನ್ಯಾಯಾಲಯ ಸ್ಪಷ್ಟಪಡಿಸಿದೆ. ವಾಹನ ಅಪಘಾತ ಪ್ರಕರಣಕ್ಕೆ ಸಂಬಂಧಿಸಿದ ಅರ್ಜಿಗಳ ವಿಚಾರಣೆ ನಡೆಸಿದ ನ್ಯಾಯಮೂರ್ತಿಗಳಾದS. G. ಪಂಡಿತ್ ಮತ್ತು K. V. ಅರವಿಂದ್ ಅವರಿದ್ದ ಪೀಠ ಈ ಮಹತ್ವದ ಆದೇಶ ನೀಡಿದೆ.

ಅಪಘಾತಕ್ಕೆ ಕಾರಣವಾದ ಬೈಕ್‌ನ RC ಇನ್ನೂ ಸುನೀಲ್ ಕುಮಾರ್ ಹೆಸರಲ್ಲೇ ಇರುವುದರಿಂದ, ಪರಿಹಾರ ಪಾವತಿಯ ಸಂಪೂರ್ಣ ಜವಾಬ್ದಾರಿ ಅವರದ್ದೇ ಎಂದು ನ್ಯಾಯಾಲಯ ತಿಳಿಸಿದೆ. ವಾಹನವನ್ನು ಮಾರಾಟ ಮಾಡಿರುವುದು ಮಾತ್ರ ಸಾಕಾಗುವುದಿಲ್ಲ; RC ಅಧಿಕೃತವಾಗಿ ವರ್ಗಾವಣೆ ಆಗಿರಬೇಕು ಎಂದು ಪೀಠ ಒತ್ತಿಹೇಳಿದೆ. ಇದೇ ವೇಳೆ, ನ್ಯಾಯಾಲಯ ಪರಿಹಾರ ಮೊತ್ತದಲ್ಲಿಯೂ ತಿದ್ದುಪಡಿ ಮಾಡಿ, ಮೊದಲು ನಿಗದಿಯಾಗಿದ್ದ 33.07 ಲಕ್ಷ ರೂ. ಪರಿಹಾರವನ್ನು ಹೆಚ್ಚಿಸಿ ಒಟ್ಟು 47.15 ಲಕ್ಷ ರೂ. ಪಾವತಿಸಲು ಆದೇಶಿಸಿದೆ. ಈ ಹೆಚ್ಚುವರಿ ಮೊತ್ತವನ್ನು ಸಹ ಮೂಲ ಮಾಲೀಕರೇ ಪಾವತಿಸಬೇಕೆಂದು ತಿಳಿಸಿದೆ.

📌 ಪ್ರಕರಣದ ಹಿನ್ನೆಲೆ

ಮಾರತಹಳ್ಳಿ ನಿವಾಸಿ ಸುನೀಲ್ ಕುಮಾರ್ ತಮ್ಮ ಬೈಕ್ ಅನ್ನು ಶಬ್ರೀಜ್‌ಗೆ ಮಾರಾಟ ಮಾಡಿದ್ದರು. ಆದರೆ RC ವರ್ಗಾವಣೆ ಪೂರ್ಣಗೊಳ್ಳುವ ಮೊದಲು, 2020ರ ಜೂನ್ 18ರಂದು ನಡೆದ ಅಪಘಾತದಲ್ಲಿ ಹನುಮಂತ ಎಂಬವರು ಮೃತಪಟ್ಟಿದ್ದರು. ಈ ಪ್ರಕರಣದಲ್ಲಿ ಮೊದಲು ವಾಹನ ಅಪಘಾತ ಪರಿಹಾರ ನ್ಯಾಯಾಧಿಕರಣ ಇಬ್ಬರೂ ಸೇರಿ ಪರಿಹಾರ ಪಾವತಿಸಬೇಕು ಎಂದು ಹೇಳಿತ್ತು. ಆದರೆ ಹೈಕೋರ್ಟ್, RC ಇನ್ನೂ ಮೂಲ ಮಾಲೀಕರ ಹೆಸರಲ್ಲಿದ್ದ ಕಾರಣ ಸಂಪೂರ್ಣ ಜವಾಬ್ದಾರಿ ಅವರ ಮೇಲೇ ಇರುತ್ತದೆ ಎಂದು ಅಂತಿಮ ತೀರ್ಪು ನೀಡಿದೆ.

ತಕ್ಷಣ ನಿಮ್ಮ ಜಿಲ್ಲೆಯ ತಾಜಾ ಸುದ್ಧಿಗಳನ್ನು ಓದಲು ಮತ್ತು ವೀಕ್ಷಿಸಲು ಕೆಳಗಿನ👇🏻 ವಾಟ್ಸಪ್ ಮತ್ತು ಟೆಲಿಗ್ರಾಂ ಗ್ರೂಪ್‌ಗಳನ್ನು ಬಳಸಿ.

Join WhatsApp Group